Historia

Igl ei stau igl unviern 1991 cura ch’entgins giuvenils han giu l’idea da fundar ina musica da tscheiver a Trun. Da quei temps prendevan gia entginas musicas indigenas part dil tscheiver a Trun ed era nus levan separticipar activamein a quell’occurenza.
All’entschatta hai giu num encurrir avunda commembers per insumma saver far in tec musica. Grazia al grond engaschi dil Gion, Iso e Patric (els meretan da vegnir numnai) havein nus beinspert anflau persunas ch’eran medemamein fascinadas dall’idea da far musica da tscheiver.

Lu, il mars 1991 ein tuts interessai seradunai alla radunonza da fundaziun. Ussa stueva l’idea dall’entschatta survegnir empau fuorma ed aschia hai dau beinenqual damondas da sligiar. Co duei la muscia da tscheiver haver num? Tgeinins instruments duvrein nus? Danunder survegnin nus ils vestgius? En tgei fuorma lein nus prender part dil tscheiver? – Damondas sin damondas!
Impurtont ei stau all’entschatta da haver in num per noss’uniun. Quel dueva star en connex cun nies vitg e haver ina nota humoristica. Denter pliras propostas ha il num Las lieurs da Trun plaschiu als presents il meglier ed aschia ei la musica da tscheiver era vegnida ‘battegiada’.

Per tut las autras damondas havein pass per pass anflau sligiaziuns aschia che las preparativas pil tscheiver han saviu entscheiver. Cun grond engaschi havein exercitau per aschia saver sepresentar al publicum cun bunas producziuns. Gl’emprem tscheiver cun Las lieurs da Trun ei lu era stau per tuts in grond suczess e ha dau anim da cuntinuar. Oz dumbra l’uniun rodund 43 commembers activs ed ei premurada da delectar era vinavon tuts cun biala musica da tscheiver.
El decuors dils onns ei l’uniun semidada empau, igl intent ei denton restaus il medem. 
La musica da tscheiver Las lieurs da Trun vul separticipar e tgirar igl usit da tscheiver a Trun. Ord quei motiv ei noss’uniun dapi entgins onns era responsabla e sestentada da scaffir ina biala ed unica atmosfera da tscheiver al vitg da Trun. Naturalmein prendin nus era part dallas differentas occurenzas da tscheiver ella regiun e lein sedivertir e festivar ensemen cun tuts amitgs dil tscheiver.

Cun ina fatscha rienta mirein anavos sin biars bials muments. Cun gronda curascha mirein anavon e sperein che noss’uniun ed il tscheiver ella Surselva possien prosperar.

VIVA IL TSCHEIVER!

Fundaziun

Il mars 1991 ei la musica da tscheiver ‘Las lieurs da Trun’ vegnida fundada entras las suandontas persunas:

  • Bundi Gion
  • Caduff Aluis
  • Caminada Rafael
  • Decurtins Marc
  • Demont Martin
  • Derungs Michel
  • Di Nolfi Salvatore
  • Flury Marcellino
  • Maissen Alexandra
  • Mazzetta Enrico
  • Mazzetta Iso
  • Mirer Fridolin
  • Petschen Magnus
  • Pfister Daniel
  • Simeon Gion
  • Tiri Rico
  • Vincenz Patric
  • Vincenz Roman

Igl intent dall’uniun ei da separticipar activamein e mantener igl usit da tscheiver a Trun ed ella regiun. Plinavon essan nus sestentai da tgirar ina buna collegialitad enteifer ils commembers.
Ils puncts culminonts dall’uniun ein segiramein stai la fiasta da giubileum da 10 onns sco era la partizipaziun als tscheivers a Beringen, Arth, Zofingen, Wetzikon, Freudenstadt (D) eav.
Deplorablamein havein nus era stuiu prender enconuschientscha dalla prematura mort da nies commember ed anteriur president Marcus Deplazes. El ei staus per nus adina in simpatic e segideivel amitg.
Car Marcus ti mauncas, en nos cors eis ti denton adina cun nus!